Bu mövsüm məğlubiyyətin nə olduğunu bilməyən “Qalatasaray” Türkiyə Super Liqasında vahid liderdir və ən yaxın izləyicisindən 6 xal öndədir. Avropa Liqasında da “aslanlar” diqqətləri üzərinə cəlb edə bilib: 6 turun ardından onların aktivində 3 qələbə və 3 heç-heçə var. “Cim-bom” son 2 oyunda heç-heçə oynayıb. “Dinamo Kiyev” ilə oyun pley-off mərhələsini qarantiləmək baxımından vacibdir.

Tribunaların sevimlisi Mauro İkardi mövsümü qapadıb. Lakin bu Okan Buruk üçün problem deyil, çünki Viktor Osimhen bu mövsüm vurduğu 14 qolla onun yoxluğunu hiss etdirmir. Komandanın dinamosu Qabriel Sara da bugünkü oyunu buraxacaq və bu amil həlledici ola bilər. Çünki braziliyalı yarımmüdafiəçi olduqca böyük həcmdə işlə məşğuldur – həm dayaq zonada, həm də oyun qurmaq baxımından.

Böyük ehtimal, “Dinamo” ilə oyunda biz Kerim Demirbayı ilk dəqiqələrdən dayaq zonada görəcəyik. Hücum xəttində dəyişiklik etmək mənasızdır – ona görə, əla formada olan Barış Alper Yılmaz, Dris Mertens, Yunus Akgün və Osimhen ən yaxşı bacardığı işi görməli olacaq.

“Qalatasaray” bu mövsüm ölkə çempionatında 52, Avropa Liqasında isə 15 qol vurub. Hər şey ideal görünə bilər, çünki fanatların istədiyi də budur deyə bilərik. Lakin taktiki baxımdan “aslanlar”ın oyunlarını izləyəndə bəzən düşünürəm ki, Okan Buruk müdafiəni unudub. Hətta bəzən buna görə, fanatlar oyunların sonluqlarını dırnaqlarını yeyərək izləyir. GS nadir hallarda qol buraxmır. Məsələn, “Bodrumspor” ilə oyunu izləyənlər, yəqin ki, son saniyələrdə “Bodrumspor”un dirəkdən dönən topunu unutmayıb.

“Dinamo” hazırda Avropa Liqasının xal yığmayan yeganə komandasıdır. Vurulan və buraxılan qolların arasında durum vahiməlidir – 1:15

Yanvarın 4-dən etibarən Kiyev təmsilçisi 4 yoldaşlıq oyunu keçirib. Rəqibləri analiz edəndə aydın olur ki, əfsanəvi qapıçısı və hazırda baş məşqçi olan Aleksandr Şovkovski “Qalatasaray” ilə oyuna ciddi hazırlaşır. Yoldaşlıq oyunları zədəsiz keçib, ona görə, “Dinamo” oyunçularının hamısı Şovkovskinin sərəncamındadır. “Dinamo”nun müdafiəsi də olduqca həssasdır. “Qalatasaray”ın ağır artilleriyasının bombardmanı qarşısında tab gətirəcəyinə inanmağım gəlmir.

Hər iki tərəfdən qol gözlədiyim oyun olsa da, düşünürəm ki, GS hücum xəttinin gücünə vacib olan 3 xalı götürəcək…

Hesab təxmini: 3:1