“Aston Villa” 4 oyundur Premyer Liqada qələbə üzünə həsrətdir… Əvvəlcə Unani Emerinin yetirmələri “Arsenal”la xalları bölüşdürdülər – 2:2. Ardınca udmalı olduğu 3 oyunda hədəfdən yayındı – qeyri-stabil “Vest Hem” ilə 1:1, səfərdə “Vulverhempton”dan yeyilən 2 cavabsız top… “İpsviç” ilə 1:1-lik bərabərlik isə aşın üstündəki qara oldu… Nəzərə alaq ki, “İpsviç” qırmızı kart aldıqdan sonra “Villa Park”da hesabda önə çıxdı və “Aston Villa” 1 xalı xilas etməli oldu…

Bugünkü qarşılaşma öncəsi Emerinin qayğıları N qədərdir. Rəsmi açıqlamaya əsasən, mərkəz zonanın dinamosu Bubakar Kamara qeyri-müəyyən müddətə sıradan çıxdı. Pau Torresin yalnız martın əvvəlində sağalacağı heç kəsə sirr deyil. Metyu Keş zədə ucbatından ən tez gələn həftə komandasına kömək edə biləcək. Həmin müddətdə Ezri Konza da zədəsini sağaltmağa çalışacaq. Əsas heyət oyunçusu olmasa da, uğurlu əvəzedici kimi özünü təsdiqləmiş Ross Barkli də zədəlidir. Bu azmış kimi, orta xəttin əsas oyunçularından biri Amadu Onana da bugünkü oyunu zədə ucbatından buraxmalı olacaq. Leon Beylinin oynayacağı da sual altındadır…

Bunları yazmaqda məqsədim nədir? “Aston Villa” dağıdıcı yarımmüdafiəçisiz qalıb. Ehtimal etmək olar ki, bu gün mərkəzdə Tilemans-Makgin cütlüyü oynayacaq. Tilemansda box-to-box kondisiyaları olsa da, Makgin üçün çətin olacaq…

“Vest Hem” və “İpsviç” ilə oyunlarda evdə əldə olunan bərabərliklər “Aston Villa”nın statistikasını bir qədər “korlasa” da, Emerinin yetirmələri bu mövsüm “Villa Park”da cəmi 1 dəfə (“Arsenal”) məğlub olub. Məsələn, bu tribunalar önündə “Bavariya” və “Mançester Siti” üzərində əldə olunan qələbələri unutmaq olmaz.

“Vulverhempton” ilə oyundan sonra bəzi ekspertlər yazdı ki, “Everton” ilə 2:2-lik bərabərlikdən sonra “Liverpul” dağılmadı… Bəli, Arne Slotun yetirmələri 3 xalı qopardı, lakin 2-ci hissədə “Liverpul” meydanda yox idi. Heç nəyə baxmayaraq, “qaliblər mühakimə olunmur” prinsipinə sadiq qalaq və qeyd edək ki, “Arsenal” ilə 7 xallıq fərq qorundu, əsas olan da budur.

Bugünkü görüşü Kodi Qakpo, Co Qomes və Körtis Counz buraxmalı olacaq. Böyük ehtimal, Qakponun yerində (sol cinahda) Luis Diazı görəcəyik, mərkəz hücumçusu isə Darvin Nunyes və ya Dioqu Jota olacaq. Qakponun itkisi olduqca önəmlidir, çünki Məhəmməd Salah kimi, o da əla mövsüm keçirir və qol qatqısı olduqca böyükdür.

“Liverpul” bu mövsüm səfərdə 13 oyun keçirib və onlardan 9-nu qazanıb, 4 dəfə isə bərabərlik əldə edib.

“Liverpul”un son oyunlarında düşüş hiss olunur. Son 2 oyunda maraqlı fakta fikir verək – həm “Everton”, həm də “Vulverhempton” qapıya vurulan zərbələrin sayına görə “Liverpul”u üstələyib.

“Liverpul”un oyunundakı düşüş və “Aston Villa”nın itkiləri, lakin keyfiyyətli hücum xəttinin olması bizə sanki qollu bərabərlik vəd edir…

Hesab təxmini: 1:1