“Barselona”nın həkimi Karlos Minyarro Qarsiyanın oyunun başlamasına bir neçə dəqiqə qalmış vəfatı səbəbindən təxirə salınan oyun may ayında keçirilməli idi, lakin federasiya matçın milli aradan keçirilməsində israr etdi. Hətta bununla bağlı mətbuat konfransında Hansi Flikə sual ünvanlandı: “Bilirsiniz ki, “Real Madrid” 72 saatdan az bir ara ilə oyuna çıxmaqdan imtina etmişdi. Siz isə 1 həftədə 3 oyun keçirəcəksiniz“. Flikin cavabı yetərincə kəskin idi: “Biz “Real Madrid” deyilik. Bunun üçün qürurluyam“.

Mart ayı “Barsa”ya düşdü desək, yalan olmaz. Hər şey “Real Sosyedad” üzərindəki darmadağınla başladı. Oyunun əvvəlindən azlıqda qalan San-Sebastyanlılar qapısında 4 cavabsız top gördü. Ən maraqlısı odur ki, “Barsa” qapısına 1 zərbə belə vurmağa imkan vermədi. Ardınca “blauqrana” ÇL çərçivəsində “Benfika” ilə rahat dil tapdı.

Madrid “Atletiko”su ilə son La Liqa oyunu isə əsl trilleri xatırlartdı. 70-ci dəqiqəyədək tabloda 2:0 yanırdı… Ardınca isə Flikin yetirmələri turbo rejimi qoşaraq hesabı 2:4 edə bildi.

“Barsa” 2025-ci ildə məğlubiyyətin nə olduğunu bilmir. Lakin indi katalonları çətin sınaq gözləyir – milli aradan sonra minimal istirsahətlə oynamağa məcburdular.

Oyundan öncə Flik bildirdi ki, Rafinya və Ronald Arauxo istirahət edəcək. Zədəsini sağaldan Kubarsi isə oyuna ehtiyyatdan başlaya bilər. Müdafiənin mərkəzində biz İnyiqo Martines – Erik Qarsiya tandemini görə bilərik.

Levandovski bazar ertəsi Polşa millisinin heyətində təxminən 30 dəqiqəlik meydana çıxıb, lakin Flikin sözlərinə görə, polyak formadadı və ilk dəqiqələrdən meydana çıxa bilər. Jül Kunde və Lamin Yamalın durumu ilə bağlı ciddi suallar var – hər ikisi millilərinin oyununda 120 dəqiqə top qovub. Bu azmış kimi, Mark Kasado azı 2 aylıq sıradan çıxıb.

“Osasuna” 6 oyundur qələbə üzünə həsrətdir. Maraqlıdır ki, noyabrın 9-dək komanda 5-ci yerdə idi. Sonra isə 15 oyun ərzində cəmi 1 qələbə əldə olundu. Fevralda doğma publika önündə “Real Sosyedad” üzərində əldə olunan qələbə qanayan yaraya azacıq da olsa məlhəm oldu. Düzdür, bu müddət ərzində cəmi 5 məğlubiyyət olub, lakin yığılan xallara görə, “Osasuna” yalnız dibdəki “Valyadolid”i qabaqlaya bilib.

Bir müddət öncə “Osasuna” “Real Madrid”dən xal qopara bildi – 1:1. Lakin bunun ardınca “Selta”, “Valensiya” və “Xetafe” ilə oyunlarda cəmi 1 xala sevindi. Nəticə – 14-cü yerədək yuvarlandı. Halbuki sezona startında ÇL planları qurulurdu.

Komandanın ən yaxşı assistenti Brayan Saraqosa zədəlidir. Üstəlik, əsas dayaq yarammıdüfiəçi Lukas Torro kart cəzalısıdır.

Əsas müdafiəçilərdən biri Flavien Boyomo çərşənbə axşamı Kamerun millisinin heyətində oynadığı üçün durumu sual altındadır. Visente Morenonun sözlərinə görə, kamerunlunun oynama ehtimalı azdır.

“Osasuna”nın əsas bəlası – ən az qol vuran klubdur: orta hesabla oyuna 0.58 qol. Lakin “Osasuna” eyni zamanda çox buraxmır – 1.42.

Liderliyini qorumağa və yaxın təqibçilərindən uzaqlaşmağı hədəfləyən “Barselona”dan foralı qələbə gözləyirəm.