“Brest” son oyunlarda özünə gəlib… Erik Rua kollektivi silkələdikdən sonra bretonlular Fransa liqasının “bataqlığı”ndan çıxdı və yenidən Avrokuboklarda iştirak uğrunda mübarizəyə qoşuldu. Bəli, “Brest” daxili çempionatdakı son 7 oyundan 6-nı qazandı. İş burasındadır ki, bu distansiyadakı həmin o tək məğlubiyyət də PSJ-də gəldi – 2:5. Sanki həmin oyunda PSJ bugünkü görüşün repetisiyasını etdi. Qayıdaq “Brest”ə… Onların məğlub etdiyi klublar arasında “Lion”, “Renn”, “Nant” var. Üstəlik, “Brest” ölkə kubokundan da ikiəlli yapışıb… Həmin “Nant”ı orada da məğlub edə bildilər.

Çempionlar Liqasının qrup mərhələsindəki son oyunlar isə Erik Rua üçün xoş xatirə buraxmadı. Onlar “Şaxtyor”a 0:2 və “Real Madrid”ə 0:3 məğlub oldu.

Bugünkü qarşılaşmada komandanın lideri Romen Del Kastilyo oynamayacaq. Jordan Amavinin oynamayacağı da dəqiqdir. Buna baxmayaraq, təcrübəli müdafiəçi Massadio Haidaranın startda çıxacağı gözlənilir.

Fransa liqasında “Brest” oktyabrın 19-dan etibarən hər ev oyununda qol buraxıb. “Brest”in qrandlarla oyunu alınmır: PSJ-dən son 2 qarşılaşmada 8 top buraxan bretonlular “Real Madrid” və “Barselona”dan ayrı-ayrılıqda 3 cavabsız top yedi.

PSJ ÇL-də olduqca gec oyandı desək, yanılmarıq. Hətta işini az qala möcüzəyə saxlayırdı. Lakin həlledici oyunlarda Paris fırtınası əsdi. Təbii fəlakətin qurbanları isə “Mançester Siti” və “Ştutqart” oldu – müvafiq olaraq 4:2 və 4:1.

Son oyunlarda PSJ olduqca məhsuldardır. Bugünkü rəqibi “Brest”i 5:2 darmadağın edən Luis Enrikenin yetirmləri “Monako”ya da eyni aqibəti yaşatdı – 4:1. Son oyunlarda gözə girən başqa bir məqam odur ki, paytaxt təmsilçisi hücumda çox kreativdir. Bəzi oyunlarda biz faktiki olaraq 4 hücumçu görürük – Dezire Due, Bredli Barkola, Xviça Kvaratsxelia və Usman Dembele. Bu hücum xəttinin qarşısında durmaq olduqca çətindir.

Dembele ümumiyyətlə karyerasının ən möhtəşəm mövsümünü keçirir. Hazırda o 16 qolla Fransa çempionatının bombardiridir. Yeri gəlmişkən, “Brest” ilə son oyunda Usman het-trik edib. Dembelenin məhsuldarlığına nə təsir etdi? Yalnız 1 məntiqli cavab var: o, artıq sağ hücumameylli yarımmüdafiəçi deyil, “saxta 9 nömrə” mövqeyində oynayır. Kimə təşəkkür düşür? Luis Enrikeyə!

Hər iki komandanın son durumunu nəzərə alsaq, fransız qarşıdurması olduqca maraqlı alınmalıdır. Qrand çapda olan rəqiblərlə oyunlarda Brest qapanmır. Bu isə tam publikanın istədiyidir.

Hesab təxmini: 1:3