DƏRD GÖZLƏMƏDİYİMİZ YERDƏN GƏLDİ

“Çelsi”nin hazırkı durumunu el dili ilə belə izah etmək olar: dərd gözləmədiyimiz yerdən gəldi… “Zadəganlar” artıq 5 oyundur qələbə üzünə həsrətdir. Maraqlıdır ki, həmin oyunlarda “Çelsi”nin rəqibləri turnir cədvəlinin aşağı 10-luğundan olan klublar idi. Kubok oyununda zəif “Morkam”ı 5:0 darmadağın etdikdən sonra hər kəs düşündü ki, paytaxt təmsilçisi yeni bir səhifə açacaq. Lakin “Bornmut” ilə oyundakı 2:2-lik hesab bu gözləntiləri darmadağın etdi. Həmin oyunda 1 xalı məhz “Çelsi” əldə etdi, “Bornmut” isə 2 xal itirdi. Paradoks… Mövcud durumda çempionluq yarışından artıq söhbət belə gedə bilməz. Lakin növbəti mövsümdə Çempionlar Liqasında oynamaq uğrunda mübarizə aparmaq lazımdır…

PROBLEMİ BAŞQA YERDƏ AXTARMAQ LAZIMDIR

Bugünkü qarşılaşmada Mudrık, Fofana və Badiaşil oynamayacaq, Dyuszberi-Hollun durumu isə sual altındadır. Zənnimcə, indiki durumda Mareska anlayır ki, eksperimentləri davam etdirmək doğru deyil. Bunun nəticəsində biz “Çelsi”nin aparıcı oyunçularını düzgün mövqelərdə görməliyik. Məsələn, Kaysedo dayaq zonada, müdafiənin mərkəzində Adarabioyo və Disasi… Palmerdən gözləntilər, həmişəki kimi, olduqca yüksəkdir…

Əslində “Çelsi”nin hücumla bağlı problemi yoxdur. “Zadəganlar” hər oyunda “Liverpul” ilə eyni həcmdə xG yığır. Demək ki, problemi başqa yerdə axtarmaq lazımdır, sinyor Mareska… “Çelsi” klass olaraq da bugünkü rəqibini üstələyir. Bunu onlar da anladığı üçün böyük ehtimal basqılı oynayan tərəf olacaq. Doğma publika da buna şərait yaradacaq…

CANAVARLARI GÖYDƏN YERƏ ENDİRDİLƏR

Baş məşqçi dəyişikliyindən dərhal sonra “Vulverhempton” 3 turda 7 xal yığa bildi. Lakin ardınca “Nottingem Forest” və “Liverpul”dan alınan 0:3 hesablı məğlubiyyətlər onları göydən yerə endirdi. Hazırda turnir cədvəlinə nəzər salsaq, “Vulverhepmton”un növbəti mövsümdə Çempionşipdə oynama ehtimalı yüksək görünür. Düzdür, Vitor Perreyranın yetirmələrinin ehtiyyatda 1 oyunu var. Lakin növbəti turlardakı rəqiblərə nəzər salanda ən optimistik fanat belə maksimum 1 xala ümid edir – “Arsenal, “Aston Villa” və “Liveprul”.

Komandanın yeni trabsferi olan mərkəz müdafiəçi Emmanuel Aqbadu kollektivlə tez dil tapdı və ardıcıl 2 oyunda start heyətdə çıxdı. Lakin “canavarlar”ın zədəliləri hələ də çoxdur – Kaladjiç, Moskera, Toti, Qonsales, Traore… Totinin önəmi haqda bundan öncəki analizlərimdə qeyd etmişdim. “Nyukasl” ilə oyunda zədəsini sağaldan Nelson Semedo oynadı, böyük ehtimal, bu gün də o start heyətdə çıxacaq. Kreyq Dousonun da ilk dəqiqələrdən oynamaq ehtimalı da yüksəkdir.

Həftə içi belə bir xəbər çıxdı ki, rəhbərlik Mario Leminanı satışa çıxarmağa isti baxır. Lemina hazırkı heyətdə sistem əhəmiyyətli oyunçulardan biridir…

“Lester” (3:0) və “Mançester Yunayted” (2:0) ilə oyunlarda qol buraxmamağına baxmayaraq, “Vulverhempton”un müdafiəsi liqanın ən zəif iki bəndindən biridir. Orta hesabla “Wolves” 1 oyunda 2.3 qol buraxır. Lakin birbaşa rəqibləri ilə müqayisədə “canavarlar” olduqca çox vurur + səfərdə daha yaxşı təsir bağışlayır…

QƏRAR ZAMANIDIR

Yəqin, ən qatı “Çelsi” fanatı da razılaşar ki, “zadəganlar” öz ambisiyalarının qurbanına çevrildilər. Bu gedişat davam edərsə, Çempionlar Liqası zonasına düşmək belə xəyal olaraq qala bilər… “Çelsi” öz əli ilə qazdığı quyudan çıxmaq istəyir. Lakin “Vulverhempton”un düşdüyü durum da analojidir…

“Stemford Bridc”də riskə gedəcək “Çelsi”yə hücum xəttindən problemi olmayan “Vulverhempton” məncə qol vuracaq… Son 4 şəxsi görüşdə də bu tendensiyanın şahidi olmuşuq. Hər iki komandanın hücum potensialı və müdafiəsindəki boşluqları belə bir proqnoz verməyə imkan verir ki, bizi bol qollu qarşılaşma gözləyir… Bəlkə də kimsə haqlı olaraq etiraz edər ki, “Vulverhempton” belə çətin səfərdən 1 xalla dönməyə razı olar. Məncə “Çelsi” buna razı olmayacaq…

Hesab təxmini: 3:2