“Cenoa” futbolçuları Patrik Vieyra gəldikdən sonra özlərini yaxşı göstərə bildi – özlərinə tay rəqiblərlə oyunda mümkün 9 xaldan 7-sini öz aktivinə yazdıra bildilər. Lakin “Roma” ilə səfər görüşündə isə yaxşı oyuna baxmayaraq, Genuyaya əliboş dönməyə məcbur qaldılar. Vieyra gələndən sonra bugünkü ev sahiblərinin oyununda ciddi artım nümayiş olunur və gedişat onu göstərir ki, qarşıya qoyulan hədəflər həll olunacaq. “Monza” ilə bugünkü görüş turnir cədvəlindəki durumu düzəltmək baxımından olduqca əhəmiyyətlidir.

Hazırda “Cenoa”nın heyəti ideala yaxındır. Yalnız mərkəz müdafiəçisi Bani və yarımmüdafiəçi Ruslan Malonovski yoxdur. “Roma” ilə oyunda Pizzili özünü yaxşı nümayiş etdirdi. Böyük ehtimal bu gün onu start heyətdə görə bilərik. Hərçənd, Milan Badel variantını da istisna etmək olmaz.

Qış transfer pəncərəsində “Cenoa” “Vest Hem”dən Maksvell Korneni kirayəyə götürtdü. Bundan başqa, 20 yaşlı müdafiəçi Sebastyan Otoa da artıq “Cenoa” üçün tər tökəcək.

“Cenoa” oyunlarını izləyənlər bilir ki, onlar möhtəşəm publika dəstəyi ilə son damla qanınadək savaşırlar. Bu yaxınlarda “Luigi Ferraris” tribunaları “Parma” üzərində əldə olunan mövsümün ilk ev qələbəsinə sevindi. Düzgün motivasiya ilə “Cenoa” istənilən rəqibi evində udmağa qadirdir…

Ardıcıl məğlubiyyətlərdən sonra “Monza” gözlənilmədən “Fiorentina” üzərində 2:1 hesablı qələbə qazandı. Lakin komandaya yeni can verməyə çalışan Salvatore Bokketinin yetirmələri “Bolonya” ilə səfər oyununda erkən qolla irəli çıxsa da, qələbə hesabını qoruya bilmədi və evə əliboş döndü. Etiraf edək ki, “Renato Dall`Ara”da “Bolonya”nı udmaq olduqca çətin məsələdir.

“Monza”nın qış transfer pəncərəsindəki hərəkətliliyi təəccüb doğurur. Dyuriç “Parma”ya kirayələndi, müdafiənin lideri Pablo Mari ilə isə “Fiorentina” ciddi şəkildə maraqlanır. Buna baxmayaraq, A Seriyasının daimi izləyicilərinə yaxşı tanış olan Akpa-Akpro “Latsio”dan”, Kasper Urbanski isə “Bolonya”dan kirayələndi. “Monza” həmçinin Yoviç və Belottiyə maraq göstərir. Lakin hər iki hücumçunun oyun kondisiyaları idealdan uzaqdır, amma statusları hər kəsə bəllidir…

“Monza” sonuncu dəfə oktyabr ayında qapısını toxunulmaz qoruyub. Bunun ardınca “Monza” 13 oyundur qol buraxır, əksər oyunlarda isə düz 2 top buraxıb. Bokettinin gəlişindən sonra “byankorossi”nin hücumları daha təhlükəli olmağa başlayıb. Lakin komandadakı itkilər və kollektiv müdafiənin olmaması rəqiblərə böyük boşluqlar verir.
“Monza” bugünkü görüşdə qol vura biləcəkmi? “Cenoa” əksər hallarda oyunlarını qol buraxmamaq üzərində qurur. Lakin buraxsa belə, “Cenoa” uduzmaz…

“Cenoa” A Seriyasında qalmaq üçün hər fürsətdən maksimum yararlanmağa çalışır və hər ötən oyun performansını artırır. Paralel olaraq, klubun yeni rəhbərliyi heyəti gücləndirmək üzərində işləyir.

“Monza”nın əsas problemi isə müdafiədədir. Stabil qollar buraxan “byankorossi”nin müdafiədəki səhvləri son oyunlarda daha da artıb.

Mən birbaşa rəqiblərin oyununu xarakterlərin döyüşü kimi qiymətləndirirəm. Xarakter olaraq “Cenoa” bugünkü rəqibindən azı 1 baş üstündür.

Hesab təxmini: 2:0