2025-ci il “Kalyari” üçün olduqca uğurlu başladı: “rossoblu” ilk 3 oyundan 7 xal çıxara bildi. Lakin ötən tur 3 oyunluq məğlubiyyətsizlik seriyası qırıldı – “Torino” 2 qolla qələbəni bayram edən tərəf oldu. Buna baxmayaraq, Davide Nikolanın kollektivini düşmə xətti ilə 1 xal ayırır.

Qapıçı mövqeyindəki rotasiya uğurlu oldu: “Napoli”dən gələn Elia Kaprile özünü yaxşı tərəfdən göstərə bildi. “Milan” ilə oyunda 11 seyv il yadda qalan kiper komandasına çətin səfər oyunundan 1 xalla dönməsinə kömək etdi. Hətta “Torino” ilə oyunda hesabın biabırçı həddə çatmamasında onun xidmətləri böyükdür.

“Kalyari”nin oyunlarındakı qol statistikası olduqca qəribədir. “Rossoblu” uduzduğu oyunların mütləq əksəriyyətində qol vura bilməyib. Bu mövsüm 12 dəfə məğlub olan “Kalyari” yalnız 2 dəfə uduzduğu oyunda fərqlənib – “Venesiya” və “Latsio” ilə oyunda… Bu tendensiyaya fərqli tərəfdən yanaşsaq, “Kalyari”nin qol vurduğu oyunlarda xal yığma ehtimalı yüksəkdir.

“Latsio”nun üzü 2 oyundur gülmür: Avropa Liqasında əhəmiyyətsiz hesab olunan oyunda “Braqa”ya 0:1 uduzan “qartallar” A Seriyasının ötən turunda doğma meydanda “Fiorentina”ya 1:2 hesabı ilə boyun əydi. “Fiorentina”ya məğlub olmaqla, “Latsio” onsuz da çox az olan çempionluq şanslarını itirdi.

“Latsio”nun heyətində kifayət qədər itki var: Partiç, Tavareş, Vesino, Lazzari komandasına kömək edə bilməyəcək. Matteo Günduzinin isə start heyətdə çıxmaq şansı var. Fransız “Braqa” ilə oyunu xəstəlik ucbatından buraxmalı oldu. Rovella və Dzakanyinin də startda çıxması gözlənilir.

Qorxuducu bir statistika var: “Latsio”nun son 8 oyununda 5 qırmızı kart çıxıb. Maraqlıdır ki, kartların əksəriyyəti rəqiblərə göstərilib – “Leççe”, “Komo” və “Verona” “Lastio” ilə oyunu azlıqda tamamlamalı oldu.

Daha bir maraqlı məqam: son 5 şəxsi görüşdə 5 qırmızı kart göstərilib.

“Kalyari”nin hava-su kimi xallara ehtiyacı var. Üstəlik, “rossoblu”nun ev oyunları templi olur. “Latsio” isə templi oyunları sevir və buna sevə-sevə ayaq uydurur. Hər iki tərəfdən vurulan qollar bu çətin oyuna əlavə rəng qatar. Ümid edirəm ki, bu oyun vurulan qollarla yadda qalar, çıxan kartlarla deyil…

Hesabt təxmini: 1:2