“Komo”nun A Seriysasına qayıdışı ağrılı proses kimi görünsə də, Sesk Fabreqas komandasını elitar səviyyəyə uyğunlaşdıra bildi. “Komo” hətta aşkar favoritlərlə oyunda belə özünü inamlı hiss edir. Bugünkü oyunadək komandanın nəticələri pis deyildi, yalnız Milan qrandları (“İnter” və “Milan”) onları məyus etdi, lakin həmin görüşlərdə də Fabreqasın yetirmələri özünü yaxşı göstərdi.

“Komo” qış transfer pəncərəsində də aktivdir və görünən odur ki, onlar dayanmayacaq. Ötən gün Dele Alli publikaya tanıdıldı. Qapıçı Jan Butes isə təcrübəli Pepe Reyna və Auderonu heyətdə sıxışdıra bildi. Yarımmüdafiəçi Kakere və forvard Diao isə artıq adından söz etdirə bildilər. Diao hətta “Milan”ın qapısına yol da tapa bildi.

Liqada qalmaq uğrunda mübarizə aparan birbaşa rəqiblərindən fərqli olaraq, “Komo” oyununu ön tərəfdə olduqca sıx pressinq üzərində qurub. Fabreqasın taktikası öz bəhrəsini verir – belə ki, “Komo” az qala hər oyunda qol vura bilir. Son 7 oyunda onlar yalnız “Inter”ə qol vura bilməyib. Lakin həmin oyunlardan 3-də hətta 2 dəfə fərqlənə biliblər.

Ötən mövsümdən fərqli olaraq, “Udineze” hazırda turnir cədvəlinin ortalarında qərarlaşıb. Kosta Runyaiçin komandası əla futbol sərgiləsə də, bəzi oyunlarda klass ayaqların olmaması özünü biruzə verir, bəzi oyunlarda isə sadəcə bəxtləri gətirmir. Udine təmsilçisi son 4 oyunda məğlub olmur – “Fiorentina”nı məğlub etmələri florensiyalıların indiki durumunda sürpriz olmasa da, “Atalanta” ilə heç-heçə oynamalarına sanki daha çox Qasperininin yetirmələri sevinirdi. Çünki oyunun bəzi periodlarında “Udineze” olduqca basqılı oynadı, lakin bəxt onlardan sanki üz döndərmişdi.

Runyaiçi sevindirən xəbərlərdən biri, sözsüz ki, hücum xəttinin lideri Lorenzo Lukkanın qayıdışıdır. Hazırda forvardın aktivində 7 qol var. Aleksis Sançesin ehtiyyatda olacağı heç kim üçün sürpriz olmaz. Maraqlıdır ki, yeni transfer (mərkəz beki) Umar Sole baş məşqçinin etimadını doğrulda bilib. Onun da bugünkü oyunda ilk dəqiqələrdən meydana çıxması gözləniləndir. Əsas heyətdə görməyə alışdığımız Okoye, Ehezibue, Dzanetti, Devis oynamayacaq.

Son 2 oyunda “Udineze”nin qol buraxmaması bir çoxu kimi mənim üçün də sürpriz oldu. Belə ki, “ağ-qaralar”ın müdafiəsi o qədər də etibarlı deyil. Udinelilərin müdafiə xətti səfərdə daha həssasdır. “Udineze” bu mövsüm ilk dəfə olaraq səfərdə “Verona” ilə oyunda qol buraxmadı.

Komandaların mövcüd formalarını nəzərə alaraq, qollu heç-heçə proqnozlaşdırmaq cəsarətini özümdə tapdım. Hər iki komandanın hücum xətti və müdafiədəki boşluqları bunu deməyə əsas verir.

Hesab təxmini: 1:1