“Liverpul” Premyer Liqada vahid liderliyini sürdürür. Çempionlar Liqasında da Arne Slotun yetirmələrinin işləri qaydasında gedir. “Qırmızılar” sonuncu dəfə 14 sentyabrda “Nottingem Forest”ə məğlub olub. Həmin gündən etibarən “Liverpul” 14 oyunda 13 qələbə və 1 heç-heçə (“Arsenal” ilə) əldə edib. Belə möhtəşəm startın 1 səbəbi, daha doğrusu, səbəbkarı var – Arne Slot. İkincisi, Mo Salah karyerasının ən möhtəşəm sezonunu keçirir. Salah TOP-5 liqalarda yeganə oyunçudur ki, qol + pas sistemi üzrə ikirəqəmli göstərici əldə edib – 12 qol + 10 pas. Qol vurmaq və ya qol pası ötürmək üçün misirli ulduza orta hesabla 65.4 dəqiqə lazımdır. Salahın karyerasında növbəti ilk…

Trent-Aleksandr Arnold “Aston Villa” ilə görüşdə zədələndi və bugünkü görüşü buraxmalı olacaq. Onu 21 yaşlı Konor Bredli əvəzləyəcək. Bredli təcrübəsiz ola bilər, lakin Vinisius Juniorun oynamaması onun yükünü azaldır. Alisson məşqlərə başlayıb, lakin qapını qorumağa tam hazır deyil. Kostas Tsimikasın da oynamayacağı dəqiqdir.

“Liverpul”un özəlliklərindən biri pressinq və topa hakim olan zaman doğru hərəkətlənməni, belə demək mümkünsə, miks etməyi bacarmaqdır. Bunu hesabına “qırmızılar” iki oyunda geridönüş etməyi bacarıb. Başqa bir misal – “Bayer Leverkuzen” ilə oyunda Slotun yetirmələri 1-ci hissədə rəqibindən daha zəif təsir bağışlayırdı, lakin 2-ci hissədə fərdi pressinq sisteminə keçdi və almanları topu tez-tez itirməyə məcbur etdi. Nəticə – tabloda 4:0 hesabı…

“Real”da krizis yaşanır… Bunun nəticəsində ÇL-də “Lill” və “Milan”a uduzdu, üstəlik, El Klassikoda “Barselona”dan 4 cavabsız qol buraxdı. “Kra klubu”nun iki əsas problemi var – ciddi kadr itkisi və Killian Mbappenin adaptasiyası.

Militao, Tşuameni, Rodriqo, Alabanın yoxluğu azmış kimi, Vini Jr. da oyunu buraxacaq. Braziliyalının nə qədər önəmli oyunçu olduğunu izah etməyə gərək yoxdur, üstəlik, Vini Jr. “Liverpul”un “qorxulu röya”sıdır – “qırmızılar”la keçirdiyi son 5 görüşdə 5 qol vurub + 3 assist edib. Maraqlı məqanlardan biri – müdafiənin mərkəzində Rüdigerlə çiyin-çiyinə gənc Raul Asensio oynayacaq.

“Liverpul” Karlo Ançelottinin ən sevimli rəqibidir desək, yanılmarıq. Papa Karlo bugünkü rəqibi ilə 11 dəfə qarşılaşıb və bu görüşlərdən 8-ni qazanıb.

Şəxsi fikrim odur ki, “Real Madrid” uduzmaz… Yaşayıb, görəcəyik..