Oyun öncəsi mətbuat konfransında Ruben Amorim etiraf etdi ki, Harri Makquayr və Manuel Uqarte bugünkü qarşılaşmaya yetişməyəcək. Beləliklə, zədəlilərin sayı 11-i keçdi… Onların arasında Lisandro Martines, Amad Diallo, Kobe Mainu və Lük Şou var. Üstəlik, diksvalifikasiya ucbatından Patrik Dorqu da “Arsenal” ilə oyunu buraxacaq. Əslində analizi burada yekunlaşdırmaq olar, lakin gəlin birlikdə oyunu beynimizdə oynayaq…

Yuxarıda qeyd etdiyimə əsasən, böyük ehtimalla Viktor Lindelöf start heyətdə çıxacaq. Əgər elə olacaqsa, isveçli müdafiəçi bu mövsüm ilk dəfə ilk 11-lik üzü görəcək.

“Qırmızı şeytanlar”ın oyununda elə bir komponent yoxdur ki, hazırda problem olmasın. MY oyunlarında biz nə görürük? Hər kəs hücum xəttindən qol gözlədiyi halda səhnəyə müdafiəçilər və digər ampluadan oynayanlar çıxır. Paradoksal olsa da, komandanın məhsuldarlığı normadadır. Lakin müdafiə xətti, yumşaq desək, rəzildir. Üstəgəl, bugünkü itkiləri də nəzərə alaq. İndiyədək MY “Old Trafford”da (bütün turnirlərdə) qapısını toxunulmaz saxlaya bilməyib.

“Arsenal”ın da ipinin üstünə odun yığılası deyil. Liqada 2 oyundur qol vurmayan “topçular” Çempionlar Liqası çərçivəsində PSV-yə 7 qol vurdu. Düzdür, həmin gün, necə deyərlər, hər zərbə qol oldu. Mikel Arteta çempionluq yarışından qopmadığını imitasiya etsə də, hər ötən turdan sonra Arne Slot və bandası onları göydən yerə endirir. Əslində “Arsenal” özü özünü bu duruma saldı…

“Arsenal” zədə ucbatından neçə turdur nominal hücumçusuz oynayır. Böyük ehtimal, bu gün də Arteta PSV ilə oyundakı heyətə və düzülüşə sadiq qalacaq. Sivri hücumda biz yenə Mikel Merinonu görə bilərik. O Meruino ki, “ayağı açılıb” və “Old Trafford”da MY qapısına yol tapmağın yollarını yaxşı bilir.

Bir zamanlar böyük oyun adlandırılan derbi bu gün yalnız kağız üzərində bu adı qoruyur. Günahkar isə bugünkü görüşün iştirakçılarıdır. MY tənqid etmək artıq boşboğazlıq sayılır, “Arsenal” isə öz əlləri (və ya ayaqları) ilə çempionluq şansını basdırdı.

MY Avropadan daha çox yorğun qayıdır və kadr itkiləri daha çoxdur. Xüsusilə müdafiədəki boşluqlar komandanın başına bəla ola bilər. “Arsenal”dan bu prinsipial qarşılaşmada 2 qol gözləyirəm.

Hesab təxmini: 0:2