“Biz “Mançester Yunayted” tarixinin ən rəzil komandasıyıq”, – “Brayton” ilə oyunda məğlub olduqdan sonra “qırmızı şeytanlar”ın baş məşqçisi Ruben Amorim deyib. Əslində portuqaliyalı mütəxəssis hər kəsin bildiyi həqiqəti dilə gətirib. Həmin məğlubiyyət Amorimin gəlişindən sonra pozitiv köklənmiş fanatların bəlkə də son ümidlərini puç etdi. Halbuki, “Arsenal”ı kubokdan uzaqlaşdırdıqdan sonra və “Liverpul” (2:2) və “Sauthempton” (3:1) ilə oyunlarda möhtəşəm geridönüş edəndən sonra fanatlar ümidlənmişdi.

Amorimin rəhbərliyi altında “Mançester Yunayted” Avropa Liqası çərçivəsində 2 oyun keçirib – doğma meydanda “Bodo Glimt” üzərində 3:2 hesablı qələbə qazanan “qırmızı şeytanlar” “Viktoriya” ilə oyunda 1:2 hesablı qələbəyə sevindi. Hər iki oyunda rəqiblər hesabı aça bilmişdi. Lakin Amorimin kollektivi xarakter nümayiş etdirə bildi…

“Brayton” ilə görüşdə Alexandro Qarnaçço, Lisandro Martinez və Rasmus Hoylund start heyətdə meydana çıxmadı. Qarnaçço ətrafında getdikcə söz-söhbətlər çoxalır. Mətbuat onu “Napoli”yə göndərir… Digər tərəfdən “Çelsi” də argentinalı ulduza “elçi düşüb”. Hoylund üçün isə bugünkü görüş böyük əhəmiyyət kəsb edir – danimarkalı forvard Amorimin rəhbərliyi altında Avropa Liqasında “Mançester Yunayted”in vurduğu 5 qolda da iştirak edib – 4 qol + 1 pas.

“Mançester Yunayted”in 4 zədəli oyunçusu var, lakin onlardan 3-ü mərkəz müdafiəçisidir. Amorimin sadiq qaldığı 3-4-2-1 sxemi sıx qrafikdə mövcud müdafiəçilərin yükünü artırır. Nəticə: son 8 oyunda “qırmızı şeytanlar” 18 top buraxıb. Yeri gəlmişkən, “Old Trafford”da keçirilən son 5 oyundan 3-də “Mançester Yunayted” azı 3 qol buraxıb.

“Reyncers” fanatlarına bəlkə də ən böyük Yeni il hədiyyəsini etdi – söhbət “Seltik” üzərində “Old firm”də 3:0 hesablı qələbədən gedir. 7 oyundur uduzmayan “Reyncers” son 3 oyunda rəqib qapılarından 11 top keçirib və 1 top buraxıb.

Filipp Kleman zədə ucbatından 3 oyunçusunu itirib, lakin rotasiyalarla heyətini buna adaptasiya edə bilib. Üstəlik, sarı kart cəzalısı olan Mohammed Diomande oynamayacaq – ciddi itkidir.

Son məlumata əsasən, son 6 oyunda zədə səbəbindən meydana çıxa bilməyən Cek Batlend bu gün start heyətdə çıxmaq üçün hazırdır. Xatırladaq ki, Batlend “Mançester Yunayted”in keçmiş oyunçusudur – əlavə intriqanı yazaq kənara. Kiçik əlavə – Batlend MY heyətində 1 dəqiqə belə oynamayıb. Lakin bugünkü görüş karyerası ərzində Batlendin MY-ya qarşı 5-ci görüşüdür. “Stok Siti” heyətində “qırmızı şeytanlar”a qarşı 4 dəfə meydana çıxan qolkiper 8 qol buraxıb, 1 oyunda isə qapısını toxunulmaz saxlaya bilib.

Görünür, mövcud “Mançester Yunayted”i heç Amorim də çözə bilməyib. “Qırmızı şeytanlar” olduqca çox buraxır. Hətta doğma meydan amili də kömək etmir. “Old Trafford”dakı son 5 oyundan 4-də alınan məğlubiyyət və sonuncu yerdəki “Sauthempton” ilə yaşanan drama bunun isbatıdır. Lakin Avroliqada MY nəyin bahasına olursa-olsun, xal yığa bilir.

“Reyncers” də qeyri-stabil sezon keçirir, lakin əhəmiyyətli oyunlarda klassını və xarakterini ortaya qoya bilir. “Seltik” üzərində əldə olunan darmadağın bunun isbatıdır. Həmin görüşdə “Seltik”in heyəti daha optimal idi. “Lion”dan alınan 3:1-lik məğlubiyyətə baxmayaraq, “Nitsa” kimi çətin rəqibi 3:1 uda bildi, “Tottenhem” ilə isə 1:1-lik heç-heçəyə razılaşdı. Son oyunlarda “Reyncers” çox məhsuldardır. Maraqlı bir statistika var: 21-ci əsrdə “Reyncers” bugünkü rəqibinin qapısına yol tapa bilməyib. Bir çox “yeniliklər”ə imza atan son dönəmlərin “Mançester Yunayted”i bu statistikanı da “düzəldə” bilər.

“Reyncers”in praqmatik və əsl komanda oyununa güvənərək və “qara zolaq”dan çıxa bilməyən “Mançester Yunayted”in doğma publikasının basqısı altında olmasını nəzərə alaraq, qonaqların 1 qoluna mərc edəcəm. Əgər “Reyncers” “Seltik” ilə oynadığı oyunu ortaya qoysa, bəlkə də bu gün tarixi qələbəyə şahidlik edəcəyik.

Hesab təxmini: 1:2