Serjiu Konseysau gəldikdən sonra az qala addımbaşı yenilənməyə can atan “Rossoneri” hələlik stabil nəticə vermir və proqnozlaşdırılması çətin klublardandır. Lakin portuqaliyalı mütəxəssis gəldikdən sonra daha cəsarətli və gözəl futbol oynamağa başlayıb – şəxsi fikrimdir. A Seriyasnda çempionluq ümidləri puç olub. Buna baxmayaraq, “Milan” ambisiyalı klubdur və hər zaman da belə olaraq qalacaq. Necə deyərlər, adı bəs edir… Derbi della Madonnina zamanı “Inter” daha üstün və istəkli idi, nəticədə uzatma dəqiqələrində 1 xalı qopardı.

“Marsel” Bennaseri sıralarına qatdı. “Milan”ın dayaq zonasında kimin oynayacağı maraqlıdır. Düşünürəm ki, diskvalifikasiya səbəbindən derbini buraxmalı olan Fofananın oynaması heç kimdə sual doğurmur. Müdafiənin mərkəzində isə, mətbuatın yazdığına inansaq, Pavloviçin yerinə Qabbia oynayacaq. Bundan başqa, Çukvueze Pulişiçi əvəzləyə bilər.

Yeni transferlərə gəlincə, italyan mətbuatı yazır ki, “Feyenoord”dan alınan Santyaqo Ximenes bugünkü qarşılaşmada startda çıxacaq. Üstəlik, Joao Felişin adı da sifariş ərizəsinə yazılacaq.

“Rossoneri” uzun müddətdir İtaliya kubokunda uğurlu çıxış etmir. Lakin Konseysau gələr-gəlməz Superkuboku qazandı və bu səbəbdən “qırmızı-qaralar” ümidlənib. Əslində Ərəbistandakı turnirdən etibarən Konseysaunun “Milan”ı uğuru sırf xarakter hesabına əldə edir. Bu amil “Roma” ilə oyunda onların dadına çata bilər.

“Roma” A Seriyasının son turunda “Napoli” ilə oyunda son dəqiqələrdə 1 xalı xilas etdi. Lakin oyuna baxanlar gözəl bilir ki, “Roma” sanki yuxulu olan və ya 1:0 ardınca gələn “Napoli”dən daha yaxşı oynayırdı. Əfsanəvi Klaudio Ranieri gəldikdən sonra “Roma”, yumşaq desək, özünə gəlib, kimliyinə qayıdıb. Sınıq-salxaq və çaxnaşmalar içində olan “Roma”nı təhvil aldıqdan sonra Don Klaudio onları 9-cu sıraya yüksəltdi.

Bəzi ekspertlər deyir ki, “Roma” daxili çempionatdan əlini üzdüyündən İtaliya kubokuna və Avropa Liqasına köklənib. Lakin “Milan” da eyni vəziyyətdə deyilmi?

Digər tərəfdən, “Napoli” ilə görüşdə Dovbik, Dibala, Paredes kimi oyunçularınm ehtiyyatda olması bir daha onu təsdiqləyir ki, Ranieri ölkə kubokuna böyük önəm verir.

“Roma” bu mövsüm səfər oyunlarında rəzil çıxış edir – “Youtube” kanalımızın daimi izləyiciləri bu barədə çox eşidib. Düzdür, Ranieri “şeytanın qıçını qırdı” və “Udineze” ilə oyunda “come back” edərək bu mövsüm ilk səfər qələbəsini bayram etdi.

Böyük ölçüdə, komandalar güc baxımından bərabər hesab olunur. İş psixologiyadadır. Bu amil isə məncə “Milan” tərəfdədir.

Hesab təxmini: 2:1