“Monza”da baş məqşçi dəyişikliyi hələlik nəticə vermir. Əgər Salvatore Bokettinin “Verona” və “Monza”dakı fəaliyyətini müqayisə etsək, A Seriyasının antirekordunun təkrarlanmasının şahidi ola bilərik – ilk 8 oyunda məğlubiyyət. Maraqlıdır ki, turnir cədvəlindəki birbaşa rəqibi olan “Kalyari”yə 1:2 hesabı ilə məğlubiyyət isə fanat qrupunun səbr kasasını daşırdı. Faktiki olaraq, hazırda elə bir durum yaranıb ki, qazanılacaq 3 xal belə puç olmuş ümidlərin bərpasına səbəb olmayacaq. Lakin “qırmızı-ağlar” stabil olaraq qol vurur…

“Monza”nın hər bir məğlubiyyəti itkilər fonunda baş tutub. Buna görə, “Kalyari” ilə oyunu Pablo Mari buraxmalı oldu, “Fiorentina” ilə oyunu isə veteran futbolçu Danilo D`Ambrozio buraxacaq. Bununla yanaşı, bugünkü oyunda kapitan Matteo Pessina, Alesio Kranyo, Roberto Qaliardini və Qiorgios Kiriakopulos olmayacaq. Çox maraqlıdır ki, “Monza”nın əsas heyətinin daimi üzvü Uorren Bondoya məhz “Fiorentina” çox böyük maraq göstərir. Onun oynayıb-oynamaması dəqiq bəlli deyil. “Monza” Bondonun satışından azı 15 milyon avro qazanmaq istəyir.

“Monza”nın son 5 oyununda mistika baş verir – onlar bu oyunları 1:2 hesabı ilə uduzub. Düzdür, Bokettinin gəlişindən sonra “Monza” yaxşı oyun sərgilədi, lakin “ağ-qırmızılar”, necə deyərlər, əlinə düşən şansları sağa-sola xərcləyir. Əslində bu amil xG gözləntisində də özünü əks etdirir – “Brianzoli” “expected goals” göstəricisinə görə autsayderlər arasında qərarlaşıb.

“Fiorentina” mövsüm ərzində 8 ardıcıl qələbə qazandıqdan sonra sanki soyuq dekabrın qurbanı oldu. “La Viola” 5 oyundur qələbə üzünə həsrət qalıb. “Mövsümün tapıntısı” adlanan Rafeal Paladdinonun kollektivi fiaskonun astanasındadır. Hərçənd, “bənövşəyi”lərin heyəti kifayət qədər keyfiyyətlidir. Yəqin Paladdino problemin çözüm yollarını axtarır.

Düşünürəm ki, kapitan Kristian Biragi ilə baş məşqçinin yola getməməsi hazırkı böhrana birbaşa təsir edir. Bəlkə də əsas amildir, kim bilir… Yeri gəlmişkən, Biragi ideala yaxın formada idi və hətta İtaliya millisində də stabil çıxış edirdi. Paladdino “Napoli” ilə oyuna 3 mərkəz müdafiəçisi ilə çıxdı və 90 dəqiqə sonra anladı ki, uğursuz eksperimentdir. Böyük ehtimal, bu gün biz ənənəvi 4-2-3-1 sxemini görə bilərik. Paladdino üçün sevindirici xəbərlərdən biri də Albert Qudmundsonun oynamağa hazır olmasıdır. Moize Kin ilə Lukas Beltranın tandemi açığı alınmadı. Lakin Qudmundson – Kin cütlüyü daha effektivdir və bunu dəfələrlə sübut ediblər.

Unutmamalıyıq ki, “Fiorentina”dan əvvəl Paladdino “Monza”nı çalışdırıb, “Brianzoli”nin zəif və güclü tərəflərini ondan yaxşı bilən yoxdur. Bəlkə də bunun hesabına “La Viola” dekabrın əvvəlindən yaşanan böhrandan çıxa biləcək və vacib olan 3 xalı qoparacaq.

Bir daha qeyd etmək lazımdır ki, liqanın ən aşağı xG gözləntisi ortalamasına sahib olmasına baxmayaraq, “Monza” qol vurmağı bacarır. “Fiorentina” müdafiəsinin indiki duruma isə qol buraxmağa açıqdır.

Lakin Paladdino çox yaxşı tanıdığı komandadan 3 xalı qoparmağa qadirdir.

Hesab təxmini: 1:3