Ötən tur “Qaziantep” səfərdə “Samsunspor”a 1:2 hesabı ilə məğlub oldu. Bunadək isə “Bodrumspor” ilə hər kəsi təəccübləndirən 0:0 hesablı sönük bir oyun izlədik. “Adana Demirspor” ilə 1:0 hesablı qələbəyə görə isə Selçuk İnanın kollektivi bir qədər qınandı. Çünki sonuncu yerdə gedən komanda ilə oyunda hesabı qorumaq, yumşaq desək, Antep azarkeşlərinin görmək istədiyi deyil. Buna baxmayaraq, qaliblər mühakimə olunmur.

Yuxarıdakı tablo bizə əslində “Qaziantep”in kimliyini göstərir. Selçuk İnan yaxşı komanda qursa da, liderlərə diş keçirə bilmir. Həmin “Qaziantep” “Samunspor” ilə yanaşı, “Fenerbahçe”, “Eyüpspor” və bugünkü rəqibi “Qalatasaray”a məğlub olub.

Böyük ehtimalla, Selçuk İnan bugünkü oyunda “Samsunspor” ilə görüşdə buraxdığı start heyətə üstünlük verəcək. Başqa sözlə, “Qalatasaray”a qarşı 3-5-2 taktiki sxemindən istifadə olub bilər. Hücumda Okereke-Boatenq tandemi rəqiblərə başağrısı olmağa bacarır. Hərçənd, “Samsunspor” müdafiəsi Boatenqi “bağlaya” bilmişdi…

Maraqlıdır ki, “Qaziantep” sonuncu dəfə doğma meydanda avqustun 18-də (2-ci turda) həmin “Samsunspor”a uduzub. Bundan sonra Selçuk İnanın kollektivi evdə 12 oyun keçirib (bütün turnirlərdə) və məğlubiyyətin nə olduğunu bilmir. Üstəlik, ardıcıl evdə 9 oyunluq qələbə seriyası da türk futbolunu yaxından izləyənlərə tanışdır. “Qaziantep” sonuncu dəfə “Qalatasaray”a 2022-ci ilin martında qalib gəlib. Sizcə harada? Əlbəttə ki, evdə…

Superliqanın lideri “Qalatasaray” 2-ci yerdəki “Fenerbahçe”ni 6 xal, 3-cü olan “Samsunspor”u isə düz 14 xal qabaqlayır. Bununla yanaşı, Okan Burukun yetirmələri Avropa Liqasında və Türkiyə kubokunda çıxışını davam etdirir. Avropa Liqasında “Ayaks” ilə ağır oyundan çıxan “aslanlar” 1/8 final mərhələsinə birbaşa vəsiqə qazana bilmədi. Avropa səhnəsindəki son 4 oyununu uda bilməyən İstanbul nəhənginin oyununda eniş hiss olunur, üstəlik, kadr problemləri və yorğunluq amillərini bir kənara yazmaq lazımdır.

Osimhen ardıcıl 7 oyundur vurulan qollarda birbaşa iştirak edib – 7 qol + 1 məhsuldar ötürmə. Lakin “Qalatasaray”ın oyununda kreativlik və bitiricilik problemləri az qala müdafiədəki problemləri üstələmək üzrədir.

Müdafiədəki problemlərə baxmayaraq, “aslanlar”ın əsas silahı hücum xəttidir. Düzdür, “Qaziantep” evdə döyüşür, lakin Okan Buruk başda olmaqla, sarı-qrmızılı cəbhədə hamı anlayır ki, pis gedişata son qoymaq vaxtıdır.

Selçuk İnanın kollektivi qol vurmağa qadirdir, lakin “Qalatasaray” buna artıqlaması ilə cavab verməyə qadirdir.

Hesab təxmini: 1:3