Qrehem Potter ilə son 4 uğursuz oyundan sonra “Vest Hem” 16-cı yerə yuvarlandı. Son turda hər kəs düşünürdü ki, “Vest Hem”in uğursuzluq seriyası 5-ə çıxacaq, lakin “çəkicdöyənlər” dedi ki, siz saydığınızı sayın, görün, biz nə sayırıq. Hücum xəttində ciddi problemləri olan “topçular”la oyunda “Vest Hem” dözdü və əlinə düşən fürsətdən maksimum yararlandı. Beləliklə, London təmsilçisi Potter ilə ikinci qalibiyyətini yaşadı.

Ətrafında söz-söhbət əksik olmayan Lukas Paketa bugünkü qarşılaşmada olmayacaq. Məlum səbəblərdən Maykl Antonio mövsümü qapadıb. Niklas Füllkruq da zədəsini sağaltmaqla məşğuldur. Cinaha ideal dinamika qatan Krisensio Sammervill də apreldən tez oynaya bilməyəcək. Komandanın onurğa sütununda özünə sanki əbədi yer etmiş Vladimir Soufalın oynaması sual altındadır. Zədələrdən təngə gələn “Vest Hem” rəhbərliyi Potter istəyi ilə “Brayton”dan Evan Fergüsson transfer edib. Potter köhnə və eyni zamanda yeni yetirməsinə start heyətdə şans verə bilər. Şəxsi düşüncəmdir – əla transferdir, sadəcə bu gəncə vaxt və inam lazımdır…

“Vest Hem” evində məhsuldarlıq sarıdan əziyyət çəkir – doğma publika önündəki son 5 oyunda cəmi 4 qol vura biliblər. Özü də o 4 qoldan 3-ü “Fulhem” ilə oyunda vurulub – Potterin “Vest Hem”in baş məşqçisi kimi ilk oyunu. “Vest Hem”in oyunlarını izləyənlər razılaşar ki, qolların azlığı Potterin taktiki sxemlərlə eksperimentlərindən qaynaqlanır. London təmsilçisi “Kristal Pelas”a 3-4-2-1 sxemi ilə oynayaraq uduzdu. “Brentford” ilə oyuna isə Potter 4-2-3-1 sxemi ilə çıxmışdı.

Ruud van Nistelroy ümidləri doğrultmadı demək yalan olmaz, lakin kadr potensialını nəzərə alsaq, bir qədər də ədalətsiz, yıxılana balta vurmaq kimi olar. Son 11 oyunda “Lester” 10 dəfə məğlub olub və yalnız 1 qələbə əldə edib. O qələbə də böhranın pik dönəmində olan “Tottenhem” üzərində əldə olunub. “Tülkülər” məğlubiyyəti sıraladığı bir dönəmdə “Vulverhempton” yeni məşqçisi ilə vacib xallar yığdı və 17-ci yerlə arasındakı xal fərqini 5-ə çıxardı.

Bugünkü qarşılaşmada Ceyms Castinin oynaması sual altındadır. Rikardu Pereyra isə dəqiq oynamayacaq: portuqaliyalı sağ cinah müdafiəçisi dizindən ciddi zədə alıb. Böyük ehtimal, onu “Parma”dan transfer olunan Voyo Kulibali əvəzləyəcək. Fatavu və Suttar isə uzun müddətə sıradan çıxıblar.

“Lester”in müdafiəsi rəzildir desək, kimsə qarşı çıxmaz – 26 oyunda buraxılan 59 qol bunun isbatıdır. Hətta “Kvinz Park Reyncers” ilə kubok oyununda 6 qol vuran “Lester” 2 qol buraxdı. Ruud van Nistelroy gəldikdən sonra komanda yalnız 2 oyunda cəmi 1 qol buraxıb. Yeri gəlmişkən, holland mütəxəssisin dönəmində “Lester”in qol buraxmadığı oyun yoxdur.

“Vest Hem” sanki yavaş-yavaş böhrandan çıxır. Turnir cədvəlində mövqeyini düzəltməyə çalışan və ad-sanına yaraşmayan yerdən uzaqlaşmaq istəyən komanda “Lester”i udmalıdır. Doğma publika önündə zəif məhsuldarlıq nümayiş etdirən Potterin komandası liqanın ən zəif müdafiə xəttini yarmağa qadirdir və məcburdur. Ekstra şərh: gənc və dinamik Evan Fergüssondan qol və qollar gözləyirəm. “Lester” də məncə ev sahiblərini əks-hücumda tutmağa qadirdir.

Hesab təxmini: 3:1