Hər ötən tur oyun baxımından artıran “Vulverhempton” olduqca qəribə bir qrafik cızır – gah liqanın ən güclülərini dizi üstə qoyan “Bornmut”a qalib gəlir, gah da elə həmin TOP klublara uduzur. Hərçənd, “Liverpul” ilə səfər oyununda “Vulverhempton”un bəxti gətirmədi. Belə ki, 2-ci hissədə “canavarlar” meydan sahiblərini “Enfild”dən sildi. Son 5 turda “avaralar” 3 qələbə qazanıb və düşmə xəttindən 5 xal məsafəsindədir. Sözsüz ki, Vitor Pereyranın gəlişi sarı-qaralar üçün dönüş nöqtəsi oldu. Portuqaliyalı mütəxəssis bir çox problemin həll yolunu tapa bildi. Hazırda çox az adam “Vulverhempton”un Çempionşipə düşəcəyini proqnozlaşdıra bilər. Halbuki, Pereyranın gəlişinədək hər kəs tam əksini düşünürdü.

Nəzərə almaq lazımdır ki, bugünkü ev sahibləri bu irəliləyişə kadr itkilərinə baxmayaraq imza atıb. Komandanın yeni transferi Emmanuel Aqbadu da zədələndi. Qonsalu Gedeşin adı bugünkü sifariş ərizəsinə daxil edilməyib, üstəlik, Rayan Ait-Nurinin oynaması da sual altındadır. Xatırladım ki, “Bornmut” ilə oyunda əlcəzairli müdafiəçi erkən əvəzlənmə ilə yadda qaldı. Buna baxmayaraq, Yorgen Strand-Larsenin qayıdışına hər kəs sevinir. O, inanılmaz formada olan Mateuş Kunya ilə istənilən klub üçün təhdiddir. Yeri gəlmişkən, Kunya ardıcıl 4 oyundur fərqlənir…

Pereyra gəldikdən sonra “canavarlar”ın ən axsaq nöqtəsi olan müdafiə xətti düzəldi. Pereyranın gəlişinədək “Vulverhempton” orta hesabla hər oyunda azı 2 top buraxırdı, lakin son 5 oyunda qapısında cəmi 3 top görüb ki, bunlarda ikisi qarşısıalınmaz “Liverpul”dan gəlib. Ən maraqlısı odur ki, “Bornmut”, “Blekbörn” və “Aston Villa” kimi klublar “Vulverhempton”a qarşı xG gözləntisini heç 1.00-ə çatdıra bilməyib. Bu isə təsadüf yox, planlı işin bəhrəsidir, razılaşın…

“Fulhem” də bir növ “liqanın Robin Qudu” olmağı sevir. Nəticədə onlar da lazımsız xal itkiləri ilə Avrokuboklar zonasına yaxınlaşa bilmirlər. Nəzərə almaq lazımdır ki, qarşıda “Brayton”, “Tottenhem”, “Arsenal”, “Liverpul”, “Bornmut” və “Çelsi” ilə oyunlar var. Bu periodda xal itirməmək mümkün deyil.

“Fulhem” də itkilərdən əziyyət çəkir. Kenni Tete dizini sağaldır, Ris Nelson və Harri Uilson isə bel və ayaq nahiyyələrindəki problemləri həll etməyə çalışırlar. “Bornmut” ilə oyun “Fulhem” üçün çox pis yadda qaldı – Marko Silva həmin oyunda 3 xalla yanaşı, Emil Smit-Rou və Tom Kirnini itirdi. Hər iki oyunçu həmin oyunu yarımçıq qoymalı oldu və bu gün oynamaları sual altındadır.

“Molinyu” səfərləri “Fulhem” üçün həmişə çətin keçib – bu stadiondakı son 9 şəxsi görüşdə “ağlar” cəmi 1 dəfə qələbə qazana bilib. Əslində protokola bu adla düşsə də, söhbət “Kreyven Kottec”dən gedir, “Molinyu”dan yox…

Vitor Pereyra, necə deyərlər, komandanın damarını tutub, dilini tapıb. “Fulhem” hər zaman təhlükəlidir, lakin xala daha çox ehtiyacı olan “Vulverhempton”u portuqaliyalı mütəxəssisin toxunuşları və Mateuş Kunyanın fantastik forması hesabına qələbəyə daha yaxın tərəf kimi görürəm. Ötən oyunda sükutu pozmayan və qarşıda ağır oyunları qrafiki olan “Fulhem”dən də qol gözləyirəm.

Təbii ki, mərcsevərlər mənim seçimimi “1X” kimi dəyərləndirə bilər. Lakin mən bu gözəl oyundan yüksək əmsal götürməyə çalışacam…

Hesab təxmini: 2:1