Çətin kimsə təsəvvür edərdi ki, “Vulverhempton”un yeni baş məşqçisi Vitor Pereyra gələndən sonra ilk 3 oyunda uduzmaz və komandanı düşmə xəttindən çıxarar. Portuqaliyalı mütəxəssis “Lester” və “Mançester Yunayted” üzərindən qələbə qazandıqdan sonra, aşkar autsayder sayıldığı oyunda böhran içində olan “Tottenhem”dən səfərdə xal qopardı.

Son oyunlardakı nailiyyətlər “Vulverhempton”a baha başa gəldi. Əvvəl “canavarlar”ın mərkəz müdafiəçisi (fikrimcə, ən yaxşı müdafiəisi) Toti Qomeş zədələndi. Ardınca isə Mateuş Kunya barəsində gecikmiş diskvalifikasiya qərarı gəldi. Fantastik formada olan Kunya “İpsviç” ilə oyunda “traktorçular”ın texniki həyət üzvünü vurduğu üçün cəzalandırıldı. Hər iki itki olduqca kritikdir. Vitor Pereyranın dərdi azmış kimi, başqa bir müəmma ətrafında baş sındırır – Mario Lemina və Andrenin “Nottingem” ilə oyunu buraxma ehtimalı yüksəkdir. Bu iki yarımmüdafiəçi oynamayacağı halda rəqib mərkəzdə böyük üstünlük əldə edə bilər. Moskera, Kalaydjiç, Traore və Sarabiyanın oynamayacağı isə artıq “köhnə təranə”dir…

“Canavarlar”ın müdafiəsi artıq liqanın ən zəifi deyil – bu, sevindirici amildir. Ardıcıl 2 “quru” oyun hər kəs üçün sürpriz olsa da, Pereyra bildirib ki, buna hazır olmaq lazım idi. Lakin olduqca güclü hücum xəttinə sahib olan “Tottenhem” ilə oyunda bu mif darmadağın oldu. Bir daha xatırlatmaq yerinə düşər ki, bugünkü görüşdə əsas mərkəz müdafiəçi Toti oynamayacaq. Gəlin, fikrimi faktla əsaslandırım – “Tottenhem” ilə oyunda Totinin yerinə Douson oynadı və “canavarlar” 2 top buraxdı.

Bugünkü görüşün nəticəsindən asılı olmayaraq, “Nottingem” ilk 3-lükdəki yerini qoruyacaq. Çünki “Çelsi” şənbə günü heç-heçə oynadı. Düzdür, “meşəbəyləri”ni bu mövqedə görmək qeyri-adi olsa da, onlar, necə deyərlər, alnının təri ilə bu yerə layiq olduğunu göstərdi. “Nottingem” ardıcıl 5 qələbə qazanıb və hazırkı forması sadəcə alqışa layiqdir. Məğlub edilən rəqiblər arasında ev sahibi olan “Everton”un olmasını unutmayaq. Hər kəsə bəllidir ki, Şon Dayçın yetirmələri TOP klubların əsəbləri ilə çox oynayıb…

Ötən oyunu sarı kart cəzalısı olaraq buraxan kapitan Rayan Yeytsin heyətə qayıtması Nuno Eşpiritu Santunu sevindirməyə bilməz. Murilyo və Hadson-Odoi ilə bağlı durum isə qeyri-müəyyən olaraq qalır. Onları yenə əsas heyətdə görməsək, təəccüblənməyək. Sağ cinahda etibarlı oyunu ilə seçilən Ramon Sosa isə ayrıca diqqətə layiqdir.

Nuno Eşpiritu Santu praqmatik futbola üstünlük verir və rəqibə uyğun olaraq taktika seçir. Portuqaliyalı mürtəxəssisin müdafiədən oynamağa üstünlük verməsi öz bəhrəsini verirdi, lakin bir müddət əvvəl 4 oyuna 9 qol buraxdıqdan sonra bəzi skeptiklər dərhal ona hücum çəkdi ki, sistem artıq işləmir. Lakin onlar yanıldı… Cüzi rotasiya ilə Santu hər kəsi səhv çıxardı… Son 3 turda onlar qol buraxmayıb…

“Canavarlar” əla formadadı, razılaşmamaq doğru olmaz. Lakin bugünkü rəqibi ondan 1 baş üstün görünür. Üstəlik, heyətdəki itkiləri də mütləq nəzə almaq lazımdır. Çünki Totinin yoxluğu müdafiənin etibarlılığını sual altına qoyur, Kunyanın olmaması isə hücum potensialını yarıbayarı azaldır.

Səfərdə oynaması “Nottingem”ə problem yaradarmı? Düşünürəm ki, yaratmayacaq, çünki “Forest” səfərdə daha təhlükəli görünür. Unutmayaq ki, Nuno Eşpiritu Santu keçmiş komandasına qarşı oynayır. O, “canavarlar”ın ruhuna bələd olan köhnə qurddur.

Ehtimal edirəm ki, çətin də olsa, “Nottingem Forest” qələbəni qopara biləcək. Böyük ehtimal, Santu ev sahiblərinə doğma publika önündə topla oynamağa məcbur edəcək və boşluqlardan maksimum faydalanmağa çalışacaq.

Hesab təxmini: 1:2